UN LIBRO

 

Autor: HervéTullet        Editorial: Kókinos

SOBRE O CONTO: Ao abrir o conto só se ve un círculo amarelo e invita ao lector a pulsar ese círculo co dedo e descubrir o que pasa. Folla a folla aparecen novos desafíos e novas sorpresas. É unha forma diferente de facer lectura, a través do xogo.

AS PROPOSTAS DE URSO:

Caderno de actividades:

Aquí vos deixamos un caderno de actividades sobre o conto. Premede na imaxe da portada para poder descargar o PDF coas actividades para imprimir.

OUTRAS PROPOSTAS:

Club de Peques Lectores: 

Pintar con espuma e colorante. Necesitamos un prato cheo de espuma de afetair e unhas gotas de colorante alimentario enriba. Cun pau imos estendendo o colorante e pintando. Ao final podemos estampar o resultado nunha cartolina e deixar secar.

Tarros da calma de 2 cores. Nunha botella de plástico engadimos auga e colorante. Opcionalmente podemos poñerlle glicerina á auga para que sexa máis espesa e se mova máis despaciño. Despois engadimos algo de aceite ata encher case completamente a botella. Pegamos o tapón con pegamento forte para evitar que se abra. E listo!!! Agora toca xirala e ver como os líquidos non se misturan e como o aceite cambia de cor ao pasar pola auga coloreada.

Na foto de Club de Peques Lectores podedes ver como o amarelo do aceite cambia a verde ao pasar polo azul da auga. É unha maneira divertida e relaxante de experimentar a mistura de cores.

El Bosque Encantado (Aula Infantil Susana) e Aula TEA de Los Soles (Vanesa Del Val):

Xogo con tapóns. Empregando material de refugallo como tapóns das cores azul, vermella e amarela, podemos traballar un pouco de lóxico-matemática con este conto. Podemos facer series, representando as follas do conto, agrupar por cores...

Depertando el deseo de aprender: 

Un libro con moito ritmo! No seguinte vídeo e no Blog Despertando el deseo de aprender podedes ver como empregar este libro para crear ritmos. Que idea tan orixinal!

O GRÚFALO

Autora: JuliaDonaldson  Ilustrador: Axel Scheffler  Editorial: Patas de Peixe

SOBRE O CONTO: Un pequeno ratiño atópase polo bosque cun montón de animais que o queren comer… pero o seu enxeño fai que todos eles acaben marchando porque lles conta que quedou para xantar cun terrible animal, moi perigoso, o Grúfalo. Será real ese animal tan terrible? Teredes que ler o conto para adiviñalo!

AS PROPOSTAS DE URSO:

Caderno de actividades:

Aquí vos deixamos un caderno de actividades sobre o conto. Premede na imaxe para poder descargar o PDF coas actividades impresas.

OUTRAS PROPOSTAS:

Este conto converteuse nun clásico da literatura infantil e por ese motivo na rede podemos atopar infinidade de recursos para traballalo e divertirvos coa historia e os personaxes. Agardamos que vos gusten!

Grúfalos, máscaras e parellas: 

E aquí tedes un documento en PDF que podedes imprimir (orixinal da Editorial MacMillan). Nel aparecen imaxes para facer un xogo de parellas e tamén as máscaras de todos os personaxes do conto, só tes que imprimilas, pintalas e recortalas! Premede na imaxe.

E nesta imaxe podedes ver ao Grúfalo feito con diversos materiais.

A cantar co Grúfalo!

E o que vos poñemos a continuación parécenos moi interesante! A CANCIÓN DO GRÚFALO interpretada con signos por Julia Donaldson (a autora do conto) e o seu marido Malcolm. Está en inglés pero pensamos que é moi moi divertida e fácil de seguir, non a perdades!

Un pouco de teatro! Tamén podedes contar vós o conto coas marionetas imprimibles e recortables (orixinal da Editorial MacMillan). Premede na imaxe para acceder ao PDF

Ou facendo un teatriño coas personaxes feitas con rollos de papel como se ve na imaxe.

O Grúfalo, a película! 

E, por último, deixámosvos o trailer da película do Grúfalo que se pode ver en Amazon Prime Video. Palomitas e cine en familia, un bo plan para as tardes de inverno na casa!

ANIMAIS

Autor: Antonio Rubio       Ilustración: Óscar Villán     Editorial: Kalandraka

SOBRE O CONTO: Os animais deste conto aparecen pouco a pouco ata reunirse nun final no que se pon en pulo o valor da amizade. 

AS PROPOSTAS DE URSO:

Caderno de investigación:

Aquí vos deixamos un caderno de investigación sobre os animais do conto! Agardamos que o pasedes xenial! 
Pinchando na imaxe podedes descargar o documento.

NOTA: O caderno de investigación pode completarse de moitas maneiras… Debaixo do nome de cada animal hai unha liña na que podedes escribilo. As preguntas poden responderse escribindo ou debuxando. Por exemplo:

Na ficha da pantera preguntamos de que cor son a maioría delas, para contestar podedes escribilo ou ben pintar un circuliño da cor correspondente.

Na ficha da cegoña podedes responder escribindo, repasando o que escribe un maior ou debuxando a resposta.

Dime que fixeches... Libro musical!

Seguro que coñecedes moi ben esta canción do grupo Migallas chea de Animais, pois xa se convertou nun clásico da música infantil en galego. Por aquí vos deixamos o vídeoclip publicado pola canle de youtube Kalandraka TV e un caderno para colorear e crear o voso propio Libriño Musical coas ilustracións de Óscar Villán. Premede na imaxe para descargalo en PDF!

OUTRAS PROPOSTAS:

La Senyo Eva (Instagram): A Senyo Eva tamén comparte no seu instagram un caderno de actividades a partir deste conto tan divertido, entre outros. Premendo na imaxe que vos deixamos a continuación podedes acceder ó seu drive e descargalo. Non dubidedes en seguir o seu perfil! 

A cantar e a signar! (Canle LSE CEIP Quiroga Palacios): Como sabedes por entradas anteriores, os contos desta colección son moi axeitados para iniciarnos na LSE (Lingua de Signos). Nesta ocasión deixámosvos un vídeo creado na corentena por unha compañeira do CEIP Quiroga Palacios. Agardamos que vos guste tanto coma nós!

A cantar con Garrapatea! Tamén vos deixamos este vídeo no que podedes escoitar o conto cantado en castelán e que foi compartido na canle de Youtube Garrapatea. Un universo musical. 

Animais para xogar! E se o que queredes e xogar a imaxinar con animais en miniatura, recomendámosvos estes de inspiración Waldorf, feitos en madeira e dunha calidade inmellorable. Podedes atopar unha chea deles na tenda online Veobio. Premede na imaxe para acceder.

LIMÓN

Autor: Antonio Rubio       Ilustración: Óscar Villán     Editorial: Kalandraka

SOBRE O CONTO: Este é outro dos contos da famosa colección de pictogramas poéticos de Kalandraka "Do berce á lúa". A musicalidade do texto e a repetición das palabras permite aos nenos e nenas engancharse dende moi pequenos a este poema visual. Parécenos un conto moi adecuado para nenas e nenos que están empezando a ler de forma autónoma, xa que o seu texto sinxelo e o ritmo permitiralles rematar a lectura por si mesmos con facilidade.

AS PROPOSTAS DE URSO:

Caderno de actividades:

Aquí vos deixamos o noso caderno de actividades sobre o conto. Premede na imaxe para abrir o PDF e descargalo.

3 en raia!

Só necesitades 6 tapóns e recortar 3 fresas e 3 limóns en cartón ou goma eva, o material que queirades, a continuación pegalas nos tapóns e facer o taboleiro, e... A xogar!

A signar e cantar!

Podedes aprender un pouco de Lingua de Signos mentres cantades a canción do conto. Aquí vos deixamos un vídeo no que podedes aprender os signos!

OUTRAS PROPOSTAS:

Receita limonada: Pasaredes un ratiño divertido e refrescante mentres preparades esta sinxela receita proposta na páxina Con mis hijos, unha bebida caseira tradicional. Na imaxe podedes ver como facela!

Mensaxes con tinta invisible: Gustariavos aprender a fabricar tinta invisible? Con ela poderedes xogar a detectives, ou sorprender a alguén cunha mensaxe secreta que só poderá ver con algunhas indicacións.

Fabricar tinta invisible é moi sinxelo, tratáse dun experimento moi divertido e non necesitades moitos materiais. Na imaxe podedes ver como facelo.

Actividade sacada de https://www.guiainfantil.com/ocio/experimentos/como-fabricar-tinta-invisible-casera-experimento-para-ninos/

Estampamos con froitas e verduras: Facer selos caseiros é unha manualidade faciliña e que adoita gustar moito aos máis pequenos. Só tedes que coller froitas ou verduras que teñades pola casa, cortalas á metade, poñerlles témpera e a estampar no papel!

Imaxes sacadas de https://www.pequeocio.com/manualidades-faciles-sellos-con-frutas/

CROCODILO

 

Autor: Antonio Rubio       Ilustración: Óscar Villán      Editorial: Kalandraka

SOBRE O CONTO: Este conto é un poema acumulativo para ler e cantar, no que podemos traballar as cores. Comeza cun extravagante crocodilo verde, verde, verde, que se sobe nun baúl azul azul, azul, que sobe...

AS PROPOSTAS DE URSO:

Cadernos de actividades:

Aquí vos deixamos o noso caderno de actividades sobre o conto. Premede na imaxe para abrir o PDF e descargalo.

E se queredes seguir xogando con este conto, aquí tedes outro caderno relacionado co vídeo que podedes ver a continuación. Premede na imaxe para descargar o caderno.

Xogos: 

Aquí tedes dous xogos, un para asociar as palabras ás imaxes, pode ser co nome das cores ou co dos personaxes do conto, e o outro de buscar parellas. Premendo na imaxe podedes abrir o PDF cos debuxos e as palabras.

Creade o voso conto: 

Segue os seguintes pasos...

1. Imprimide os debuxos que vos deixamos a continuación.

2. Pintadeos, recortádeos e pegádeos sobre cartolina.

3. Escribide debaixo de cada debuxo ou recortade letras de revistas e pegádeas formando palabras.

4. Encuadernade, cosendo as cartolinas con la ou corda ou grampa.

Premede na imaxe para abrir o PDF.

OUTRAS PROPOSTAS:

Educando lectores: Construímos unha torre cos personaxes do conto. Teredes que facer o debuxo de cada cousiña que sae no conto, pegalos en pezas de construción, caixiñas, ou outro obxecto apilable de refugallo que atopedes. A continuación colocaredes os personaxes como van aparecendo no conto, que ten por riba o crocodilo? e o baúl? Tamén podedes facer a torre con algún erro e xogar a atopalo, e todo aquilo que se vos ocorra.

Imaxe extraída de http://www.educandolectores.es/